香港中文大學，又名中大/暴大/ CU / ChinU，位於新界沙田馬料水，坐東鐵去「大學站」就可以去到。中大校園依山而建，佔地仲大過梵蒂岡，周圍又係花草樹木，所以有「山城」之稱。

教學

學科
中大有八個學院，分別係文、理、社、商、醫、教、工、法。中大較出名嘅科有社會學、政治學、哲學呢類人文學科，除此之外，當然唔少得有「三大名氣，八大分數」嘅工程學啦。

大學通識科
中大希望同學可以學到主修以外嘅知識，所以設有通識科，佔十份一大學學分。大學通識科要求同學接觸哲學、社會、科學等範疇嘅知識。有人當係比機會自己喺Major以外輕鬆下，有人當係屈靚Grade，睇你點睇啦。

PE堂

中大係少數有PE堂嘅大學，仲要著PE衫添！Year 1嘅學生要揀兩個運目項目上堂，佔兩分學分。不論一般嘅運動例如足球藍球游水，定大家少接觸到嘅手球捧球，PE堂都有得揀，希望畀中大人多啲嘗試，建立運動嘅習慣。

書院制
講起中大特色，一定非「書院制」莫屬。中大基於歷史原因，一開始係由三間書院以聯邦嘅方式組成嘅。嚟到今日，中大已經發展到有九間書院，而唔同書院有唔同宿舍、活動、獎學金，但同你嘅學科係冇關係嘅。簡單啲講書院可以類比為哈利波特入面嘅葛萊分多同史萊哲林，或者中學嘅社，當然規模同影響嘅層面更加大啦。

中大書院分「四舊」同「五新」，「四舊」指四間歷史較耐嘅書院，人數較多，活動、文化、傳統發展都成熟，但設施一般較舊；「五新」係五間新嘅書院，大約只有十多年歷史，設施又新又齊全，較少傳統同習俗，自由啲。書院絕對會影響你部份嘅大學生活，不論圈子定生活模式，所以入中大想要咩生活都豐儉由人㗎！以下會介紹唔同嘅書院。

崇基學院（Chung Chi College）

• 崇基學院，大家都叫CC
• 有基督教背景
• 資源最多嘅書院之一，出名多錢多船
• 覆蓋範圍幾乎係中大整個山腳位置
• 十間宿舍同一個走讀生舍堂，宿舍文化係中大最強嘅，有唔少宿舍之間嘅活動
• 都要出席較多週會，要做FYP(Final Year Project)

新亞書院（New Asia College）

• 人人都叫NA
• 中大歷史最悠久嘅書院
• 位於山頂嘅NA有四間宿舍，景色一流-
• 由一班反共學者創立，強調儒家等人文精神
• 每年一樣有幾個大活動畀NA人盡情玩，唔洗做FYP
• 比起其他書院資源較少，對錢同船唔好抱太大期望

聯合書院（United College）

• 簡稱UC
• 位於山頂，有四個宿舍，環境都算唔錯
• 每年都有幾個大活動畀同學參與
• 除咗要做FYP之外，每樣嘢喺四舊書院嚟講算不過不失。

逸夫書院（Shaw College）

• 通常會直接叫佢Shaw
• 位於中大後山最入位置
• Shaw人出哂名玩得Yo得，亦都有唔少大規模書院活動
• 住得 Shaw就預咗「Don’t have Hall 」喇，事關佢得兩棟宿舍，而且住宿率都較低

和聲書院（Lee Woo Sing College）

• 有廣為人知嘅「和盡天地風雲之聲」Beat詞
• 位於後山位置
• 五新書院嚟講算係多嘢玩
• 宿舍設備齊全，每間房都有雪櫃
• 適合想玩又唔想住四舊嘅人

伍宜孫書院（Wu Yee Sun College)

• 又名523/數字書院
• 人唔多，活動都搞得唔大規模
• 位置又處於後山，因此成日俾人笑老人院/摺
• 院方好支持學生實踐環保同創新嘅理念，除咗好多交流機會，書院入面仲有個創意實驗室

善衡書院（S.H. Ho College）

• 位於山腳位置，四通八達，
• 四年必宿，規定學生一定要住宿舍，宿舍環境良好，設備齊全
• 有「共膳」，規定某啲時間全書院嘅人一齊喺飯堂食飯
• 人數只有600人，全部人又一齊住喺兩棟宿舍，畀人一種家嘅感覺

晨興書院（Morningside College）

• 位於山腳位置
• 四年必宿
• 有過半嘅學生都係國際生，書院人數只有300
• 亦有「共膳」聚埋大家一齊食飯
• 生活得耐會識到好多外國人，講得一口流利英文

敬文書院（CW Chu College）

• 位於中大後山較偏僻嘅地方，一個世外桃園
• 基於外觀，加上都係四年必宿，亦有「共膳」，經常被稱「敬文酒店」
• 有學生亦會選擇踩單車去上堂
• 適合想住宿，又想遠離煩囂嘅人

中大地標

地理

中大大致上可以按地理位置分為四個部份嘅。

• 山腳：中大山腳一帶，近大學站，覆蓋崇基、善衡、晨興三間書院
• 本部：中大山腰，唔屬於住何書院嘅地方，大學圖書館、科學館、百萬大道都喺嗰度
• 山頂：中大之巔，海拔最高嘅地方，覆蓋新亞同聯合書院
• 後山：山頂後嘅地方，中大嘅後花園，位置較偏僻，範圍亦好大，覆蓋逸夫、和聲、伍宜孫、敬文四間書院

景點/特別地方

中大咁大，有啲地標你係一定要知嘅。

• 民主女神像：簡稱「民女」，係喺大學火車站A出口一個有象徵意義嘅一個雕塑。「民女」亦可解作大學站A出口對出空地，約人搭地鐵走可以約「民女」等。
• 未圓湖：崇基嘅一個湖，假日會吸引唔少情侶同家庭喺旁邊野餐。
• 煲底：位於本部嘅科學館對出空地，由於科學館其中一部份外型太似一個煲，所以空地位置就叫煲底。
• 百萬大道：原名林蔭大道，係喺中大本部一個好大嘅廣場，連接「煲底」同大學圖書館。相傳百萬大道用咗一百萬蚊整，又有人話百萬大道用咗一百萬塊磚砌成，點解叫百萬大道嘅真正原因到宜家都冇答案。
• 烽火台：大學圖書館對出嘅一個地台，地台上有「仲門」。
• 仲門：係一個好似門嘅嘅藝術品，傳聞穿過仲門中間會畢唔到業。
• 文化廣場：本部於范克廉對出嘅小型廣場，由學生會管理

• 天人合一：合一亭，位於新亞書院，由於嗰度影相太靚，係遊客嘅打卡勝地。呢個地方經常引嚟過多街外人入侵中大，對中大人生活造成困擾。
• 七小龍：YIA大樓有七條扶手電梯，一次過搭到哂7條嘅機會低過中六合彩，因為總有一條係壞緊嘅
• 小橋流水：一條由崇基教堂通往本部嘅長樓梯

中大文化

藝墟
每年開學頭，中大唔少學會都會喺百萬大道擺Booth招生，向新生介紹自己。當中有表演，有嘢食，有嘢玩，好似一個嘉年華咁，氣氛幾開心㗎！

Dem Beat

提起中大，好多人第一時間都會諗起Dem Beat。中大絕大部份學會、學系、活動宣傳定Ocamp都會Dem Beat，Beat詞同動作各有特色。雖然好多人都覺得Dem Beat 好難頂，但亦有唔少人覺得係中大特色，冇Dem過Beat唔好話自己讀中大。唔知大家又點睇呢？

四七
「四七」顧名思義就係四句七個字，Total廿八個字嘅一段字。通常「四七」會作嚟片人，或者用嚟讚自己。好嘅四七聽落簡單直接，有創意，同時保留到每句最後一隻字係押韻。大家喺Ocamp、上莊、定其他活動都會搵到「四七」嘅蹤影。

食宵

唔理係去火炭食、去大圍食，定去大埔墟食，總之讀得中大食宵夜嘅頻率會大大增加。Ocamp又食、組聚又食、傾莊又食、完咗活動都會食！

會師

每年中大嘅大O(書院Ocamp) 都有一個環節叫「會師」又名「互片」，喺百萬大道舉行。「四舊」同「五新」書院會分開進行，內容大致就係輪流向其他書院Dem Beat／片四七，踩其他人讚自己。成個百萬大道咁多人喺度嗌，場面幾咁墟冚！當然大家都明係玩下，冇惡意嘅。

校巴

成間中大咁大，冇校巴基本上係生存唔到嘅。唔好睇啲校巴路線咁複雜，搭下搭下就慣㗎喇。中大人搭校巴仲有自己嘅禮儀，例如落車時會同司機叔叔講「唔該司機」。

頹？山區兒童？村姑？

中大宿舍全部都喺校園內，變相令唔少人會「落街上堂」，經常會見到中大人著「頹tee」、短褲、「踢拖」，冇乜打扮。其實換個角度，大家都當中大係屋企，咪用自然啲嘅一面生活，打扮樸素啲囉，都係中大嘅特色嚟！

特別術語

院系級：

• 院：書院，通常用書院頭嗰隻字：例如崇基就用「崇」
• 系：學系，通常用學系兩隻字嘅簡寫，例如工商管理就叫「工管」
• 級：年級
• 加埋就係院系級，通常四隻字，例如新亞政治與行政學三年級就會寫成「新政政三」

宿舍：

• 宿：宿舍/hall，可配其他字使用，例如宿費、宿工
• 蛇：非法宿舍居留者，可以配動詞及名詞
• 動詞：收蛇（收留非宿生），屈蛇（屈居喺宿生度），打蛇（檢查宿舍有冇「蛇」）
• 名詞：蛇床（蛇瞓嘅床），蛇主（蛇嘅主人）
• 共膳：宿生集體一齊去飯堂食飯
• 走讀：冇宿住嘅學生

課程：

• 大通：大學通識科
• 書通：書院通識科
• 大中：大學中文課
• 大英：大學英文課
• Reg科：報名嗰個學期修讀咩課程
• CUSIS老母：CUSIS係中大reg科嘅系統，每次你reg唔到科就會搵佢母親

莊：

• 莊：只要有心，任何學生組織都可以叫莊，有分長短。長莊包括宿生會、學會、系會；短莊包括Ocamp莊，短期活動嘅莊。莊亦可配不同詞語使用。
• 動詞：上莊（參與學生組織）、Quit莊（退出學生組織）、冧莊（上多年莊）、傾莊（參與簡介會，認識其他人）、成莊（支莊成功組成），落莊（成功過渡莊期）
• 形容詞：Chur莊、頹莊、孖莊（上兩支莊）、長莊、短莊、上莊（去屆嘅成員）、下屆（下屆嘅成員）
• 名詞：莊員（一齊上莊嘅成員）、莊期（莊嘅任期）、莊聚（莊內聚會)

其他：

• Dem Beat：上面講咗!
• 四七：上面講咗!
• 會師：上面講咗!
• 片：批評/彈/踩
• 船：獎學金
• NDS：內地生(Nei Di Sheng)
• 段崇智：係校長個名，但由於冇人識佢，所以歸為術語

教學大樓

由於真係太多大樓喇，呢度只介紹啲一定要識嘅地方先。

• CYT鄭裕彤樓：地位於鐵站B出口巴士總站外，係商學院嘅基地
• YIA康本國際學術園：山腳一棟幾大嘅大樓，同WMY相連重，上必修科目好大機會喺度上
• WMY伍何曼原樓（五條鰻魚）：山腳一棟幾大嘅大樓，同YIA相連，上必修科目好大機會喺度上
• AIT綜合教學大樓：話就話綜合，但其實係建築系嘅地頭
• ELB利黃瑤壁樓：山腳嘅教學大樓
• 三兄弟：信和樓、陳國本樓、王福元樓，由於三棟大樓連住，人 人都叫佢三兄弟
• LSB邵逸夫夫人樓（Lady Shaw）：本部教學大樓之一，有個好大嘅天台花園
• LSK李兆基樓：本部教學大樓之一，法律系地頭，有一部連接山頂同本部嘅電梯
• MMW蒙民偉樓：本部教學大樓之一，有一部連接山頂（新亞）同本部嘅電梯
• U Lib 大學圖書館：位於本部，全中大最大嘅藏書閣
• Engineering Building工程學大樓（展標）：工程仔嘅地頭，部份地方會收唔到訊號，有部連接山腳同本部嘅電梯

— — — — — — — — — — — — — — — — — — — — — — — — — — 
想知道更多大專嘅資訊同加入大專嘅社群就㩒落呢度👉🏻https://goop.ai/